中環出更：全家總動員做義工享天倫
做善事除咗可以幫到有需要嘅人，對自己嚟講都可以係一種體驗同訓練，國際獅子總會早前舉行新一年度中國港澳303區就職典禮，由馮妙雲（Grace）接替羅少雄（Paul）成為新一任總監。講起近年多咗隱蔽青年，Grace話今年目標除咗希望加強服務年輕人外，仲希望帶多啲年輕人出去做義工，服務番其他人。
Grace話佢哋現時有透過社工接觸一啲隱蔽青年，了解同鼓勵啲隱青一齊參與義工活動，好似佢哋舉辦嘅「傷健同行全城運動日」咁，豐富殘疾人士生活之餘又可以令年輕人多啲了解傷健人士嘅生活問題同需要，一舉兩得。佢仲分享自己請人嘅經驗，話試過見到有求職者成年冇做過嘢，但了解過原因之後依然聘用對方，呼籲其他僱主遇到同類情況都嘗試了解，減少「有工冇人做，有人冇工做」的情況，而佢自己年輕時初出茅廬亦試過連續兩、三個月搵唔到工，勉勵年輕人唔好怕辛苦，乜嘢都要勇於嘗試。
陳添恩另類「沖涼」體驗
至於前總監阿Paul同副總監陳立德都非常支持年輕人多服務社會，仲搵埋自己啲仔女加入獅子會。陳立德話自己多年前加入獅子會，之後太太Amy見佢咁落力就參加埋一份，耳濡目染下連兒子陳添恩同女兒陳嘉恩都加入幫手。
阿仔陳添恩仲笑言，有次喺泰國探訪孤兒時，要同啲小朋友喺河邊沖涼，但另一邊阿妹同啲女仔就竟然喺河嘅遠處洗衫同洗頭，佢哋又有同當地小朋友玩遊戲，雖然係好簡單嘅事，但對大家嚟講都係好不平凡同深刻的體驗。而阿Paul就有女兒Stephaie繼續喺會內服務，仲難忘中秋節時教小朋友整燈籠添！
卓妮