政情：梁敬國暑假陪囡囡赴泰比賽
暑假已經過咗一半，唔知今個暑假一眾政界家長會帶仔女去邊度玩呢？商務及經濟發展局副局長梁敬國（Godfrey）今個暑假衝出香港，六月尾去咗泰國六日五夜。Godfrey透露，今次去泰國係陪囡囡比賽，而唔係純粹去玩。平日唔止陪太子女去玩，仲要陪埋比賽，Godfrey果然係廿四孝爸爸。
上月去澳門衝浪「搏殺」
Godfrey以往每年都會同囡囡去迪士尼樂園「朝聖」，但由於依家樂園進行緊擴建計劃，所以今年佢就無同囡囡去玩喇。唔止去泰國比賽，Godfrey上月尾仲同囡囡「過大海」，去咗三日澳門，但今次就真係陪囡囡去玩喇。佢仲話，今次去澳門係去「搏殺」，原來佢所講嘅「搏殺」係講緊衝浪，事關佢囡囡係鍾意動態運動，所以趁有假期就齊齊去「搏殺」喎。