政情：九東新東逾半候選人 跨區空降

港島參選者 多居原區

若只計算名單排首位嘅候選人地址作比較，其中九龍東十二張名單中，八名候選人地址都唔係喺九龍東，佔三分之二，屬於最高，其中較為接近九龍東嘅有荔枝角、將軍澳、石硤尾，但亦有候選人，如人民力量譚得志同工聯會黃國健，地址分別遠在大埔甚至上水區，若要去九龍東選區服務市民，相信車程超過半個鐘。

其次新界東選區就有過半候選人要跨區服務，廿二張名單之中，有十二人並非當區居民，佔五成五。當中七名候選人住喺港島區，如獨立無黨派候選人方國珊住喺堅尼地城、無申報政治聯繫嘅廖添誠住喺中半山、民主思路麥嘉晉就住喺薄扶林、工黨張超雄及獨立民主派鄭家富就住喺鴨脷洲、人民力量陳志全住喺西灣河，又係要一段車程先去到新界東。

至於其餘選區，以香港島嘅非當區居住候選人數目最少，只佔兩成，當中只有熱血公民鄭錦滿住喺旺角、獨立民主派司馬文住喺清水灣，住得最遠嘅係香港眾志羅冠聰，住喺東涌。九龍西及新界西選區嘅非當區居住候選人數目就分別佔三成三及三成五，跨區較遠嘅係參選九龍西嘅維園衝鋒朱韶洪，住喺天水圍；參選新界西嘅香港政研會高志輝，住喺柴灣，以及新民黨田北辰，住喺南區。

選民要求愈來愈細緻

香港地小人多，交通發達，加上立法會服務幅員較廣，所以有講法話就算候選人並非住喺參選選區，亦無礙議員履行職務。不過，依家選民要求愈來愈多，甚至愈來愈細緻，如果議員住喺同區，相對協助居民亦有幫助。其實五大地方選區候選人跨區服務尚算講得通，但有關俗稱「超級區議會」嘅區議會（第二）功能界別議員，一個人要服務全港市民，服務成效就實在令人質疑喇。