未將剩勇追窮寇 漢奸餘孽通街走

好似佔領運動期間當局拘捕近千人咁吖，迄今被起訴或定罪嘅都係魚毛蝦蟹，至於幕後黑手同金主，包括人稱「漢奸黎」嘅壹淫媒老闆黎智英以及罪魁禍首嘅「佔中三子」等四十八人，至今仍然逍遙法外，印印腳不知幾happy。警方近日交代調查最新進度，話已經完成調查，正等候律政司進一步指示喎，唔通漢奸餘孽落鑊在望？

望梗係咁望嘞，不過市民睇怕最終都係失望居多。聽吓警方點講吖，佢哋強調案件複雜而且涉案人士眾多，舉證要求高，檢控時要採取審慎態度喎。咁就奇嘞，佔領落幕後，警隊前高層明明實牙實齒話三個月內完成調查，點解律政司拖近兩年都未檢控？擺明係警方同律政司互扯貓尾喇，指望佢哋儆惡懲奸，伸張正義，蚊都瞓蛇都死。

點解警方同律政司好似撞鬼咁，硬係唔敢將呢班禍港殃民嘅搞手繩之以法？講到底咪係驚咗佢哋背後有外部勢力撐腰，投鼠忌器囉。咁就難怪一眾佔領搞手有恃無恐，當初好似民主鬥士上身咁，爭住「預約被捕」博坐監，其中「政治主教」陳日君話為自己逍遙法外而「感到羞恥」，漢奸黎仲大大聲話「唔怕坐監，淨係怕洗廁所」添。鬼咩，佢哋知道港府所謂調查執法，其實只係做場大龍鳳敷衍民意，仲有乜好怕喎。

香港就係咁嘅嘞，話就話法律面前人人平等，實際上係有啲人更加平等。佔領之亂搞到香港雞毛鴨血，被拉被判嘅都係無名之輩，大粒嘢就鬆毛鬆翼，你話公平何在吖？仲有，無權無勢嘅小市民偷一個幾毫都要拉要鎖，反而漢奸黎同一眾反對派政客捲入幾千萬元嘅政治黑金案，廉署查來查去都冇下文，你話係咪雙重標準吖？

好在人間自有正氣在，仗義每多屠狗輩。佔領期間三位壯士向喺金鐘「私家皇座」打躉嘅漢奸黎投擲豬內臟，為此身陷囹圄亦在所不惜。仲有一班民間團體近日頻頻包圍聲討漢奸黎，佢哋嘅堅持同大義凜然固然令人欽佩，但如果唔係警方姑息養奸，又使乜民間義士自己出手吖。

未將剩勇追窮寇，漢奸餘孽通街走。今日香港烏煙瘴氣，本土港獨甚囂塵上，歸根究柢都係港府處理佔領不力，帶頭破壞法治。知恥近乎勇，希望當局今次做番場好戲，洗脫無能形象喇。