中環出更：市民又踩上門聲討漢奸黎前世唔修
壹傳媒黎智英（漢奸黎）涉秘密捐款予泛民主派政黨及立法會議員，又喺前年參與佔領行動，被指為佔領行動「最大金主」及「幕後黑手」，民間對其批評之聲不絕。尋日又再有一批不滿漢奸黎嘅人帶同寫有「黑金賣國漢奸黎智英，造謠禍港殃民壹傳媒」字眼嘅橫額同各種標語，去到漢奸黎寓所外示威抗議，怒斥漢奸黎黑金亂港。漢奸黎搞到自己日日家嘈屋閉，真係前世唔修。
「毒媒禍港 黑金禍國」
尋日十八名男女喺下午二時許，去到漢奸黎位於何文田嘅寓所外示威，佢哋都自稱係自發嚟抗議嘅。十八名示威人士喺漢奸黎寓所嘅正門對面拉起橫額，並舉起印有「毒媒禍港、黑金禍國」、「宣淫賣國一傳媒，黑金漢奸黎智英」及「支持特區政府，依法懲處漢奸」等字樣嘅標語，又高呼口號抗議。警方接報到場，然後登記有關人士資料，眾人逗留約一小時後和平散去。
近月針對漢奸黎嘅示威行動不絕，自上月十日起計，連同尋日到其寓所及將軍澳壹傳媒大樓外嘅示威行動最少達二十八次，當中自稱係霸王國際集團員工及苦主嘅佔十次、正義聯盟佔三次，包括旅遊業界同其他人士則有十五次。
卓妮