中環出更：市道差 租金升 飲食業捱打
飲食業經營愈來愈困難，香港餐務管理協會會長楊位醒話，去年業界整體生意維持約一千億元，同前年相若，但其實喺零售方面，例如快餐店及茶餐廳嘅營業額都下跌。不過，去年受惠於雙春兼潤月嘅好年，營業額先冇大幅下跌，而今年係「盲年」，少好多適合結婚嘅日子，預計婚宴會大幅減少。
楊位醒話，食肆租金不能超過整體成本嘅一成半，人工就只能佔兩成八，食材就佔約四成，再加上水電煤，做老闆嘅幾乎冇得賺。更有大型連鎖快餐店透露，今年現金同八達通消費一樣，現金數字就反映自由行數目大減。佢話業界明年會搞世界粵菜廚王大賽，通常每次比賽後，生意都會增加約百分之八，希望「沖喜」一下。
黃傑龍指難話搬就搬
對於租金有否回落嘅問題，叙福樓集團執董黃傑龍就話，雖然零售業下滑情況下有唔少吉舖出租，但其實好多放租嘅都係賣奢侈品嘅街舖，未必適合做食肆。至於續租嘅舖位就更加係「絕對冇得減租」，反而加咗百分之十至二十，事關飲食業多數投資好多錢喺裝修，例如廚房設備，或者業主就係睇準呢點，知道食肆裝修完唔會話走就走，所以就繼續加租。
黃傑龍又話，今年淡季嘅生意比往年更靜，要靠五至六月母親節及父親節拉返勻，而嚟緊有商場食住手機遊戲「Pokémon Go」風潮推出相關措施吸客，估計都可以短暫增加人流。香港餐飲聯業協會會長黃家和就認為，雖然市面上出現部分舖位出租，但以現時整體零售環境，唔少業界均持審慎觀望態度，未必敢冒險投資。
卓妮