據講雲南情蠱嘅威力非同小可，如果想要一個人對你忠誠到死心塌地，永不變心，好簡單，對佢施法即可。呢單嘢係真係假，功夫茶答你唔到，之不過有樣嘢可以好肯定，最懂得情蠱箇中三昧嘅唔係雲南人，而係英國佬。
點解咁講，睇吓財爺鬍鬚曾呢個人辦咪知囉。話說佢尋日接受電台訪問，失驚無神盡訴心中情，大讚佢嘅前主子兼沙煲兄弟曾蔭權爵士「行政表現一流」，肯聽下屬意見，搵唔到比佢更好嘅人才；又激讚佢嘅前前主子、末代港督肥彭係一個「有歷練嘅政客」，懂得「抓大放小」，「所以有時間去打網球食蛋撻」，寫嘢又叻，認為肥彭嘅工作風格值得參考喎。
嗱，鬍鬚曾對兩位前主子推崇備至，套用周星馳嗰句，佢嘅崇敬之情直頭有如滔滔江水連綿不絕。你話嘞，曾爵士醜聞纏身，家陣係「過街老鼠」，人人避之則吉；至於肥彭咯喎，出晒名係「千古罪人」，臨走前仲埋下大堆地雷。呢兩條友將香港害到雞毛鴨血，任何一位真正愛香港嘅人，肯定係不齒佢哋嘅作為，劃清界線都嚟唔切，鬍鬚曾居然對佢哋一往情深，永不變心，真係重口味喎，如果唔係中咗蠱毒，又點解釋呢啲靈異現象呢？
所以話啫，香港問題千頭萬緒，歸根究柢就係主權回歸，治權未回歸。回歸十九年後嘅今日，港英餘孽仍然呼風喚雨，佢哋身在漢營心在曹，施政梗係一團糟。好似話有「民主阿婆」之稱嘅陳四萬，當年做特區阿二，專登同老董作對，落台後仍對洋主子念念不忘，郁下就飛去英國告狀；又好似曾爵士，做咗特首都唔肯放棄呢個英女王御賜嘅銜頭，仲話過要去英國落葉歸根添；至於鬍鬚曾，身為港府大掌櫃，理應配合港府施政喇，點不知有人話佢同港府高層對着幹，阻頭阻勢，空穴來風未必無因㗎。
大家有眼睇，港府坐擁金山銀山，基層市民水深火熱，偏偏佢老哥守財奴上身，一時話有結構性財赤，一時話要審慎理財，總之藉口多多，佢唔肯放水咯喎，港府施政又點可能暢順吖，社會矛盾又點可能唔惡化吖，唔怪得有富商批評佢唔肯使錢作公共投資，係「歷史大罪人」喇。現屆政府施政寸步難行，民怨沸騰，固然同特首個人能力及作風有關，但其他高官唔通冇責任嘅咩？
北大人成日慨嘆香港人心未回歸，梗係啦，連港府都充斥咁多港英無間道，胳膊肘往外拐，人心點可能回歸喎。最好笑係，如今唔少港英餘孽吼住下屆特首個位，北大人真係要擦亮雙眼，唔好隨意握手，唔好錯完再錯喇！