政情：名廚落嘴頭 氹新血入行
早前政府公布四至六月失業率，地產及教育行業失業率都上升，但從事飲食業嘅名廚甄文達（Martin）同新光集團創辦人胡珠就話飲食業好難搵人，仲落足嘴頭唱好飲食業，吸引新血入行。胡珠話，好多人都覺得飲食業，特別係做廚房一定係好熱、工時又長，其實依家啲廚房已經有冷氣，佢仲以自己徒弟為例，話廚師都可以月入十幾萬。唔知佢咁講會唔會令年輕人心動入行呢？
Martin就話，以前啲人讀得書少，可以揀嘅職業唔多，依家啲人讀得書多，自然唔想捱，所以飲食業好難搵人入行。
收入隨時高過教授
不過，佢就叫大家唔好睇小飲食業，因為做呢行嘅收入係可以高過啲教授喎。胡珠都話，啲人嫌做廚房辛苦，但人工其實唔差，好似佢徒弟就因為被賞識，之前過咗澳門做廚師，之後又有人高薪請佢返香港做嘢，依家月薪高達十幾萬。不過，要想有咁高人工，唔知係咪要先跟Martin同胡珠學師先呢？