政情：續掌醫管局 「賢」起棚牙笑
今時今日有咩可以令人笑到見牙唔見眼，除咗中六合彩之外，莫過於加人工同續約喇！消息話，做足六年醫院管理局行政總裁嘅梁栢賢（PY），近日爭取第二次續約成功，如果佢履行晒未來三年嘅合約，就會邁向服務醫管局九年，成為在位最耐嘅行政總裁。
上載舊照藏玄機
PY一向活躍社交網站facebook，除咗幫醫管局推銷好嘢，間中又上載周遊列國嘅生活照。近期佢就上載咗一張笑到見牙唔見眼嘅舊照出來，「R撈」叫大家將來可以搵佢賣牙膏廣告，有朋友更加改圖成全佢，將佢張相同黑人牙膏先生拍埋一齊。原來呢張相內有玄機，「R撈」係假嘅，實情係成功續約三年，開心笑到見牙唔見眼至真！
至於續約會唔會加薪呢？PY話四月已加咗政府通脹嗰百分之四喇。佢之前帶領過醫管局解決專科門診輪候時間過長、檢討醫管局山頭主義、策劃醫管局二千億元嘅十年大計等，咁熟手，唔同佢續約都唔得啦！