政情：擦鞋搲爛面 鬍鬚曾想點

電台訪問 力讚前上司

鬍鬚曾喺尋日播出嘅電台節目訪問入面，講起同曾蔭權共事嘅點滴，唔單止話一齊工作「好開心」，仲大讚曾蔭權喺行政上表現「一流」，長時間都見唔到有邊個工作比佢好，又指對方對香港好有心。其實冇耐之前，曾蔭權先至被批評施政不濟同走精面，但鬍鬚曾竟然覺得有關批評「幾奇怪」，又聲稱不知何謂「走精面」。

句句有骨 似意有所指

鬍鬚曾反指曾蔭權肯聽意見，並非「由上壓落嚟」，而係大家討論，可以呢度改啲、嗰度改啲，亦唔係要「一個人贏晒」。聽落真係句句有骨，唔知佢講緊邊個要「一個人贏晒」呢？被問到曾蔭權任內有乜不足，鬍鬚曾更加係「護主心切」，話大家一齊工作，如果有不足，佢都有責任喎。不過，高官問責制早已名存實亡，就算有責任都毋須負責，如果唔係鬍鬚曾肯肯定唔能夠過渡今屆政府。

鬍鬚曾又喺節目中提到舊老細肥彭。曾任肥彭私人秘書嘅鬍鬚曾話，肥彭因為「揸住啲大嘅，放晒啲細嘅」，只着手睇政改、政治、媒體關係同毒品等大議題，其他工作都放手畀下屬做，所以可以有時間去打網球、食蛋撻。

鬍鬚曾又讚肥彭寫嘢好叻，寫「Letter to Hong Kong」，一個題目半個鐘就寫到出嚟。鬍鬚曾呢番話，莫非又想影射有人愛集權，唔願下放權力同工作？

曾蔭權在任時施政劣迹斑斑，而肥彭亦曾經被批「千古罪人」，惟恐天下不亂，遺禍之深，鬍鬚曾如今公開對兩人有讚冇彈，但就對現任特首梁振英隻字不提，究竟用意何在？曾蔭權和肥彭卸任執包袱時都係冇鞋挽屐走，唔知鬍鬚曾擦咩鞋呢？