中環出更：名人進修 劉靳麗娟舊書新體會

劉靳麗娟認為翻睇舊書感覺似溫故知新。（葉華英攝）

黃玉山：日日都有新嘢學

作為大學校長，黃玉山話自己已經修畢碩士同博士學位，而佢亦都被冊封院士，所以讀到咁上下都冇再讀落去喇。不過，隨着資訊科技日新月異，大家都利用即時通訊軟件及社交媒體溝通，佢認為「活到老，學到老」，每日都不停進步，所以覺得每一日都可以有新嘅嘢學。

本身係拔萃女書院校長嘅劉靳麗娟就話，依家已經冇持續進修，但係會翻睇舊書。佢解釋，隔咗咁多年，經歷過好多唔同人同埋事，翻睇同一本書嗰陣都會有唔同嘅體會，無論喺角度、吸收程度都會有唔同，感覺就好似溫故知新。

至於譚贛蘭都曾經進修過，仲修讀埋碩士學位。不過，佢同劉靳麗娟、黃玉山嘅進修歷程就有啲分別喇，事關譚贛蘭當年有政府資助，仲可以去埋英國牛津大學進修，呢啲就係政務官嘅福利喇。講起讀書嘅嘢，當然唔少得學生哥最愛嘅暑假啦。譚贛蘭話，其實佢唔鍾意長途旅行，多數揀近近哋嘅地方，仲特別鍾意返內地旅行，咁佢出遊都唔使擔心近期歐洲恐襲事件喇。

譚贛蘭當年得到政府資助去英國進修。

黃玉山覺得每一日都學習緊新事物。