政情：張仁良無懼恐襲 飛德國探仔
最近歐洲頻頻發生恐襲，早前科大校長陳繁昌就話暑假唔會去歐洲，轉去美國旅行。不過，教育大學校長張仁良就冇有怕，決定暑假同法國籍太太去德國探望兒子，佢地仲異口同聲話「呢啲嘢無得驚」，仲話更加唔應該驚。
「唔應該向惡勢力低頭」
張仁良認為，施襲者目的都係想人驚，從而影響正常生活，所以佢同太太都話「唔應該向惡勢力低頭」。張仁良透露，今次係兒子主動要求叫佢哋去德國，佢仲同兒子講笑，話「依家我又唔係你個仔，應該掉番轉頭係你返嚟香港探我先啱喎。」
張仁良早前先整親隻腳，喺上月嘅教大「出生日」晚宴都仲要撐拐杖，依家過咗成個月，雖然都大致好番，但依然仲要撐住拐杖，上樓梯時會無力。佢透露，依家仲要勤力啲做物理治療。希望去德國前快啲完全好番，咁就唔使帶住拐杖對抗惡勢力喇！