政情：邱達根辦荔園 成員工紅娘
荔園暑假回歸，移師到機場博覽館舉行，令不少家庭都增添一個懷舊好去處。荔園主席邱達根（Duncan）透露，自從再辦荔園後，成功促成多對情侶，有員工，亦有遊客。聽起來，荔園化身成現代紅娘！Duncan話，今年荔園重聘唔少去年請過嘅學生員工，呢班學生喺荔園做暑期工互相認識，今年再返荔園打工時，已經有兩、三對成為情侶，其中更有一對情侶，去年喺碰碰車攤位打工，一起坐碰碰車而「撞出愛火花」！
唔禁拍拖 工作開心至上
Duncan笑指，相信呢班情侶成世都記得荔園，而佢絕對唔會禁止員工談戀愛，最重要係員工工作開心！佢又話，早前仲見到有一對遊客情侶，去年喺荔園拍拖談情，今年更到荔園影結婚相，睇嚟荔園桃花幾旺喎！Duncan又自爆「甩轆」趣事，話說佢頭兩日去博覽館，忘記登記機場快綫優惠，隨手就用八達通拍卡付款，結果較原本來回只需五十七蚊車費，總共蝕咗一百蚊，提醒大家一定要登記優惠呀！