政情：火棒無人接 民陣等住摺
近年民間人權陣線（民陣）舉辦七一遊行嘅參與人數大減，又有多個創會成員，包括學聯等相繼退出，政治影響力明顯大不如前。適逢今年十月民陣換屆，又再出現無人接任召集人嘅難題，有民陣中人大鬧泛民主派政黨只識利用民陣搞遊行籌款抽水，但對日常運作就不聞不問，反正「人又冇、權又冇」，不如趁機解散民陣，實行一了百了。
韓連山無打算出任召集人
由多個民間團體同政黨組成嘅民陣，本身係用來協調泛民示威行動，但隨住泛民碎片化，學生團體、本土組織及政黨各自舉辦大型活動後，民陣嘅作用大減，而召集人一職更變成燙手山芋，幾乎每年都無人願意出任。民陣將於十月初再次換屆，有傳兩名正副召集人將會裸退，召集人岑子杰照慣例不可留任，而副召集人吳仲達亦會因為個人理由淡出，民陣又要四處張羅召集人。
民陣中人指，有建議提出由進步教師同盟成員韓連山（韓老師）接任召集人，認為韓老師經驗豐富，勝任有餘，加上召集人一職係三煞位，其他人都唔想做，讓畀韓老師就最好。韓老師接受查詢時否認傳聞，指自己時間及體力都未預備好，無打算出任召集人。佢又話，現時已好少處理民陣內部事務，未知組織內有此討論。連韓老師都拒絕，莫非民陣召集人一職去到十月需要懸空？
對於未能覓得召集人，有民陣中人就推想若無人願意付出，建議趁民陣未完全衰落前解散，以完成歷史任務嘅姿態光榮引退。不過，亦有人將矛頭指向同為民陣成員嘅泛民政黨，狠批泛民政黨利用民陣舉辦嘅七一遊行籌款，但就拒絕參與遊行嘅前期工作、唔出席民陣會議，「七一當日街站過百個，但前期有幾多人開會先」，認為民陣唔應該畀泛民利用成為籌款工具，建議不如解散。
解散需三分之二團體支持
不過，要成功解散都並唔容易，按民陣會章，需要三分之二嘅成員團體支持先可正式解散，然而，五十幾個民陣成員團體中，泛民政黨佔十個，亦包括政黨核下的嘅組織，如此泛民政黨又點會容許肥豬肉喺口中溜走呢？所以只會繼續當民陣做乳牛，不停榨取牛奶，榨乾榨淨後等第二年再榨過，所謂解散，相信最後都係不了了之居多喇！