中環出更：黃毓民反口 拒簽確認書
本土派聯盟「熱普城」（熱血公民／普羅政治學苑／城邦派）嘅參選人鄭錦滿早前報名參選立會時，率先簽署選舉管理委員會喺今屆立法會選舉新推出嘅反港獨確認書，但佢事後又表明會繼續支持港獨，同時遭支持及反對港獨嘅網民圍插。另一「熱普城」成員黃毓民尋日報名參選立法會九龍西直選，佢起初指確認書係一份多餘嘅文件，簽咗都無妨，但最終又拒絕簽署，只喺一份自行製作、寫有《基本法》全部一百六十條條文嘅確認書上簽名。
質疑林鄭係新策操盤人
黃毓民批評選管會要求所有參選人簽署確認書明顯係打壓本土派，「簽又死，唔簽又死」。對於選舉主任去信詢問部分本土派參選人對港獨問題嘅立場，佢認為選舉主任本應政治中立，無權審查參選人過去言論，今次做法係「荒天下之大謬」。佢又自稱收到消息，有選舉主任曾向高層反映「咁搞唔得」，結果被政務司司長林鄭月娥逐個勸服，質疑林鄭係今次打壓事件嘅操盤人。
已報名參選九龍西直選嘅仲有民建聯蔣麗芸名單、經民聯梁美芬名單、民主黨黃碧雲名單、公民黨毛孟靜名單、民協譚國僑名單、新思維狄志遠名單、青年新政游蕙禎、小麗民主教室劉小麗、維園衝鋒朱韶洪及演員李泳漢。
卓妮