喺六名勞方委員杯葛會議下，標準工時委員會喺四月推出標準工時第二階段公眾諮詢，主席梁智鴻（金刀梁）話份諮詢文件循大框（合約工時）、小框（廿八個工時組合）、大小框並行或毋須任何框架等四方面進行，但勞工代表早就講明唔收貨，有勞工團體仲趁住尋日諮詢結束之前發起大遊行，批評標委會強推次輪諮詢，質疑係為咗合約工時而鋪路添！老實講，勞工界早就質疑標委會偏聽，就連金刀梁日前都承認份報告因為勞方退出談判桌而有偏差，所以金刀梁玩大、小框呢台獨腳戲，肯定畀人柴台喇！
