政情：羅正杰揀租戶 首選原創品牌
位於中環嘅PMQ元創方，原本係想為本地設計師提供一個好地方，但早前曾爆出生意差，商戶紛紛退租。羅氏集團副主席及行政總裁羅正杰（Bosco）話，集團喺西九龍都有一個推廣本地文化同創意嘅商場，第二期預計年底開幕，原來目前有幾個租開PMQ嘅本地品牌，打算轉租佢哋嘅商場，依家仍商討中，唔方便透露詳情。邊啲租戶先可以入場？佢哋挑選嘅準則都係視乎係咪原創嘅本地品牌同設計。
Bosco又話同PMQ都熟嘅，仲透露當年開PMQ，都有接觸佢哋，安排佢哋旗下嘅本地品牌進駐，當時諗住支持下PMQ，所以都入咗去。
對緬甸前景有信心
問到集團喺緬甸開設廠房嘅情況，佢話現時當地局勢已較去年穩定，對前景都有信心，亦好彩早已搵到合適地點建廠房，因為依家愈嚟愈多人想去緬甸投資，打算建廠房時，一係就搵唔到，一係就遇到「海鮮價」，價錢高得過分，無法順利設廠。