政情：即將退火線 嫻姐恨做背包客
立法會議員陳婉嫻（嫻姐）尋日出席一個書展活動時，提到仲有大約兩個月時間就會離開議會工作，難得終於可以有機會同空閒時間，正計劃去旅行，仲話想試一次做背包客，因為咁多年嚟都未試過一個人去旅行，自駕遊就試得多。
嫻姐話以前環境普遍都好窮，所以讀完書之後都冇好似依家啲學生咁孭住背包一個人旅行，只係孭住書包去打工，反而到依家難得有機會就想試一次一個人嘅旅行，不過就未知身邊嘅人會唔會唔放心。
盼闖日「女性禁地」
有乜嘢旅遊計劃？佢話依家已有幾個，包括先去美國、日本、台灣同內地。話說早前有教授向佢提起日本世界遺產高野山嘅歷史，嗰度以前係禁止女性進入嘅地方，令嫻姐非常好奇，希望同教授親身到訪一次。
佢又講起自己特別喜歡逛市集，身上戴住嘅琥珀項鏈，就係喺俄羅斯買嘅，價錢好便宜。