中環出更：謀轉職私人機構 橄欖懶神秘
今屆立法會正式曲終人散，多名議員都表明唔會競逐連任，其中包括九龍東嘅直選議員陳鑑林（橄欖）。但橄欖退而不休，佢接受報章訪問時透露，告別議會之後考慮轉職私人機構，發揮商業管理嘅經驗。橄欖接受查詢時對於轉職私人機構一事顯得神神秘秘，話九月請記者飲茶時先公布詳情喎。莫非有不可告人嘅秘密？
話九月先公布詳情
旁敲側擊之下，橄欖承認有私人機構邀請佢加盟，但佢仍然喺考慮當中。橄欖向來炒樓同炒股票都有一手，私人機構嘅工作範圍會唔會同投資有關？橄欖就話暫時不便透露詳情，九月請記者飲茶時先同大家詳談，仲叫記者們到時一定要賞面出席添！
其實橄欖都無必要收收埋埋，事關議員退休之後加入私人機構搵真銀早已見怪不怪，相信社會大眾都會好理解。
卓妮