中環出更:窮遊世界捱方包 項明生瞓墳場

旅遊達人項明生(James)尋日出席新書講座,仲請來拔萃男書院前校長張灼祥擔任分享嘉賓。講起依家好興窮遊世界同佢哋當年後生做背包客嘅經歷時,連張灼祥都忍唔住要請教James到底係點樣用咁少錢捱咁耐。

同樣做過背包客嘅張灼祥話自己曾寄宿喺外國家庭,但好似去到法國咁,人哋肯畀個地方你瞓,但對方就講到明自己都食無定時,無辦法提供膳食,叫佢一日三餐自己搞掂,咁佢有時都係食吓麵包又一日,但始終頂唔到咁長時間,相反James只係用一千蚊美金就捱足一個月,令佢非常驚訝。不過好快佢就發現咗點解喇,事關James自爆當年每日只係喺超市買方包食,形容係「維持最低生存」,而張灼祥雖然都係食麵包,但就唔係喺超市買嗰啲,加上張灼祥有時都會去餐廳食,話貴唔貴,但同超市嘅方包相比,價錢就梗係唔使比都知邊個便宜啲啦,所以謎底即刻解開。

「最安心兼地方靚」

James又話當年每晚都係隨便搵地方瞓覺,好似火車站、火車同公園等,有次搵到個公園有波波池,瞓到一半畀警察用電筒照住佢,但對方冇趕佢之餘仲話佢醒目,咁都畀佢搵到個咁舒服嘅地方。不過講到瞓得最安心嘅地方,竟然係墳場,皆因墳場冇賊敢打劫,地方又靚,冇做過虧心事嘅可以瞓得好好咁話。

話說今年James推介大家坐河船遊世界,經常帶名人到訪非洲等地嘅菁英遊輪香港代表林樹德亦有出席,原來佢除咗係郵輪專家外亦係攝影達人,佢話香港都可以影到好靚嘅銀河系相片,而尋晚就正正係拍攝好日子喇!

卓妮

第一手消息請下載on.cc東網iPhone/iPad/Android/Windows Phone Apps