近日，有人提出倒梁口號「Anyone but CY」（ABC）來參選立法會。梁振英表示ABC不是新聞，而是政治。可惜香港並沒有政治家，只有愚昧的野心家。一個政治家或者政治領袖，最重要的是實踐其提出來的政綱，亦即係言行合一。CY執政已有四年，講就天下無敵，可是講咗又怎可以當做咗？
沒有勇於踐行，善念終究是個空殼。大家有目共睹：香港嘅基層依然多艱、社會矛盾更形尖銳、貧富差距愈來愈大；改善民生得把口，發展經濟大隻講，團結各方睇唔到，每次示威喊得山崩地裂嘅口號就係叫佢下台，又或者畀傳媒追問佢快將下台嘅消息，佢都故作鎮定，語帶輕藐地回應。
嗱！老朽當然知道做領導，必須有信心，個個未上台都雄姿英發，上天攬月，下海邀龍王對飲，完全冇難度，總之你噏得出佢使命必達；到真正為民執政就醜態百出。有道是知行不合一留下的是權力欲望的不斷放大，再往前發展就是前蘇聯出現過的最大悖論──社會主義國家產生了特權階層。咁香港又會唔會由五十年不變，轉成產生了巨變？
呢方面一啲都唔奇！文首提到的ABC口號，老朽不認為是新聞，也不認同CY所說的是政治，那是甚麼？嘻！它是讖語。「讖」是一種預言，咪以為老朽冇科學精神而在此導人迷信。讖語代表上天嘅暗示、替天行道等嘅道統，歷史上有不少例子，證明佢work㗎！好似《史記‧秦始皇本紀》記載嘅讖語：亡秦者胡也。秦始皇以為「胡」指胡人，派大將蒙恬北擊匈奴，又勞民傷財大築長城，最後秦亡於胡亥；胡亥乃秦始皇第十八子，公子扶蘇嘅弟弟。胡亥庸碌無能，聽從趙高讒言殺了扶蘇，終又被趙高殺了。「秦亡於胡亥」，某種意義也算是應讖，卻令後人唏噓，大秦竟亡於自己子孫？歷史幾弔詭都有，ABC會出現一個女特首嗎？順應世界潮流，女人當道，難說也。反正揀來揀去都係籮底橙。