政情：公民講場：「施」施然補鑊 仲呻請人難

近年本港接連發生海上事故，二○一二年發生南丫海難，釀成卅九人死亡慘劇，舊年又發生躉船撞汲水門橋事件。海事處尋日就公布提升船隻航行監察服務系統同部門改革嘅工作，而上任未夠一年嘅海事處處長鄭美施就嗌晒救命。話說鄭美施就提到海事處同其他航運業一樣，都面對好嚴峻嘅招聘困難同青黃不接問題，佢又話依家全世界海上行業都請唔到人，業界「嗌救命」，佢哋已開始檢討職系架構、入職條件同培訓事宜，希望可以吸納新血喎。海事處早前先畀申訴專員公署狠批佢哋嘅跟進調查工作極度差劣等五宗罪，市民對住劣迹斑斑嘅海事處，先係要嗌救命至真！