政情：劉怡翔買樓風波 妻：清者自清

涉收緊按揭成數前「趕尾車」

劉怡翔被揭發喺一○年掌管按揭公司期間，喺金管局宣布收緊非自住物業嘅按揭成數前九日，趕「尾班車」以自己、太太同個女嘅名義聯名買咗兩個何文田豪宅物業，其後更為兩個單位做足七成按揭；相比起收緊按揭成數後，共畀少逾一百六十萬港元首期。劉怡翔之後將兩個單位放租，六年嚟樓價升幅有四至五成，帳面勁賺七百萬港元。

劉怡翔早前堅稱話自己無參與制訂或提早知悉金管局將出「辣招」，又辯稱無利用職權或利益衝突。金管局已將事件交由外匯基金諮詢委員會嘅管治委員會跟進調查，預計喺呢幾個星期內會作出交代。