中環出更：中出帶學生遊書展悅讀
香港中華出入口商會（中出）尋日舉行「我們一起『悅』讀的日子」慈善書展活動，帶六百個學生一齊去逛書展買書，卓妮見到香港教育工作者聯會副主席蔡若蓮都有到場，佢認為養成閱讀習慣好重要，因為一個人嘅經歷始終有限，必須要靠閱讀他人經歷先可提升個人內涵，佢又指腹有詩書氣自華，一個人嘅氣質往往都同佢嘅閱讀習慣有關喎。
蔡若蓮話依家資訊爆炸，學生好多時鍾意睇節錄多過睇晒成本書，閱讀傾向雞精化同碎片化，但佢認為有啲經典著作都係要睇晒嘅，好似讀經濟嘅人冇理由唔睇晒成本亞當史密斯嘅《原富》，而讀文學嘅學生又冇理由同人講冇睇過四大名著及莎士比亞嘅書一樣，認為呢啲書之所以能流傳後世確係有佢哋獨特價值嘅。
至於該會青委副主席蔡德昇（Stanley）除咗呢日帶啲學生嚟書展外，嚟緊仲會再帶自己仔女一齊嚟，笑言「父子一齊睇，唔驚冇話題」喎！原來佢平日喺屋企都經常同仔女一齊睇書，書展更係佢哋暑假活動之一，不過佢就認為書展可以好似電影咁分等級，再以門票顏色劃分小朋友可以進入嘅區域，咁即使家長唔得閒陪小朋友去，都會比較放心咁話。
同場仲有中出副會長陳勁、青委主席楊靜同立法會議員黃定光（象哥）等。陳勁話今次除咗帶學生進場外，亦會資助學生交通費及每人一百五十元買書，佢哋仲好鼓勵學生寫作，更輯錄咗上年參與學生所寫嘅文章成書，送畀今年嘅學生睇添！
象哥睇書口味隨年紀變化
象哥就話自己睇書口味隨年齡改變，由童年時鍾情天馬行空嘅小說到長大後熱衷歷史書，佢又話細個鍾意睇港漫，覺得畫功吸引拳風有動感，可惜港漫光輝時代已過，依家同小朋友一齊睇日本動漫一樣有樂趣。
卓妮