政情：M+新行政總監現身 西九真．齊班？
西九文化管理局高層不斷跳船，尋日就公布任命華安雅女士為M+博物館行政總監，喺十一月一日正式上任，接任喺今年一月約滿離任嘅李立偉。華安雅嘅任命，加上今個月上任嘅營運總裁陳惠明，管理局話團隊已經齊備，將會全速落實市民期待已久嘅西九文化區咁話。
其實西九管理局高層頻頻變動，好似行政總裁一職於一○年至今，六年內已有三個唔同人士擔任過，其中謝卓飛只做咗短短五個月，就同管理局「閃電分手」，而繼任嘅連納智雖然做咗較長嘅四年，但最終亦以健康同照顧病重太太為由而提早離任。基於頻密嘅人事變動，今次華安雅嘅任命同樣惹嚟外界嘅關注。
華安雅賣口乖感光榮
董事局主席話M+項目已進入完成同啟用階段，華安雅係最合適嘅人選去領導M+呢個階段嘅工作，經佢同意後簽訂五年合約，希望佢能夠持續於文化區內進行M+項目工作。華安雅隨後亦賣口乖，話對任命感光榮，形容係「一生人一次嘅機會（Opportunity that comes once in a lifetime）」添！