政情：獵艷深入童心AV仁（火羅）爆
民主黨（白鴿黨）嘅立法會議員何俊仁（AV仁）退休，仲自爆唔再競逐連任嘅理由，係因為任內犯咗兩件好戇居嘅錯誤，就係獲邀參加國泰法國豪華收機團同喺議事廳睇AV相，就連早前有兩個細路女搵佢合照，影完之後，仲話：「多謝AV仁叔叔」，真係「火羅」爆。
AV仁日前接受網台訪問時，話自己做咗咁多年議員，應該讓畀人做，尤其呢兩年犯咗好戇居嘅錯誤，人民不會忘記，佢話：「好似成世都唔會去啲立法會探訪團，唔知點解國泰叫我去我就去咗，咁就賴嘢，陳偉業同我講，佢去咗三次，湯家驊都去咗三次，都冇事，我去一次就領嘢。」
仍死撐個個有着衫
對於喺議事廳睇AV相，佢否認係AV，仲話：「係睇女仔相，真係攞命，個個都有衫着o架。有兩個細路女走埋嚟，仲幾得意o架，埋嚟同我影相，影完相之後話『多謝AV仁叔叔』，真係嘔電。」佢承認呢件事對佢傷害好大，但發生咗自己要認衰。咁太太嬲咗幾耐？佢話：「唔係嬲咗好耐，又唔係有小三，咁就冇得救。」