政情：醜事當政績 何秀蘭捉蟲
立法會上年年中政改方案表決期間，建制派議員拉大隊離場，釀成甩轆醜聞。建制派離場時，泛民議員何秀蘭曾經要求點算法定人數，差啲就幫建制派拖延時間，好在被其他議員阻止，先力保不失避免成為建制救星。呢件醜事本來都無人再提，點知何秀蘭竟然喺近日嘅宣傳單張上，講到自己係政改英雄咁，被網民大鬧係篡改事實、失實聲明。
網民大鬧篡改政改事實
有港島區網民話收到何秀蘭嘅宣傳單張，發現佢形容自己「2015年政改投票一役，促使大會從速投票，令建制派暫停會議的企圖未能得逞」。網民批評佢嘅單張係篡改事實、失實聲明，亦有人形容佢係點人數「未遂」，質疑佢記憶混亂，活喺平行時空。
正所謂「有片有真相」，我哋翻睇當年政改表決嘅片段，見何秀蘭喺建制派離場時，起身要求點算法定人數，被多名議員阻止，涂謹申高叫︰「唔使「口架」喇！」亦有後方嘅泛民議員爆粗要求佢收聲，片段嘅記錄似乎同佢喺單張上所指有明顯出入。
何秀蘭前日喺個人facebook上解釋，指自己只係向秘書處提出點人數，以防因為會議廳唔夠人而投唔到票。之不過，佢嘅解釋亦好牽強，事關當時表決鐘已響起，代表正召喚議員投票，當時根本毋須要求秘書處點人數。如果佢仍然認為此舉正確，咁就反映佢唔多熟悉議事程序。與其「死雞撐飯蓋」，不如老老實實承認甩轆好過啦！