中環出更：貿發局50載 方舜文回味飛行夢
香港貿易發展局成立至今五十周年，該局舉行一連串以「飛躍五十載．同行創商機」為主題嘅慶祝活動，卓妮尋日喺其中一個活動上就見到貿發局總裁方舜文，講起飛躍呢個主題，佢坦言童年時一直想飛，畢業時更一圓飛行夢，喺英國大玩跳降傘，畢生難忘。
人哋話台上一分鐘台下十年功，方舜文就話跳降傘一分鐘，要練足四十個鐘，事關當年喺英國玩嗰種降落傘係冇人一齊飛嘅，所以要學足四十個鐘先可以跳，但佢笑言大部分時間都係望天打卦，觀察天氣適唔適合飛，其餘時間就不停練習由一個地方跳落去再打觔斗。至於跳嗰一刻則要以英文讀出一千零一至三，教練會喺耳機聽住，如果數得出即係冇暈倒，如果聽到佢數唔出或者冇咗聲就會即刻跳落去跟住佢，所以都好安全，而佢就梗係順利數到啦！
伍婉婷細個用指甲油畫畫
講番個活動，藝術家馬興文同灣仔區議員伍婉婷亦有參與，為咗配合主題，仲邀請咗五百名青少年一齊進行大型繪畫活動。見啲學生都有主動搵伍婉婷一齊畫畫同油顏色，伍婉婷就笑笑口自爆畫畫一啲都唔叻，細個仲成日畀同學笑添！記得有次畫香港街景，佢畫咗間髮廊，諗住描繪一個女人由髮廊走出嚟個頭整得靚靚，於是就用咗阿媽支指甲油嚟畫個女人啲頭髮，點知畫出嚟立立令咁好滑稽。依家佢好少搽指甲油，出去整gel甲仲靚咁話。伍婉婷仲話手工係佢爸爸嘅強項，佢自己耍家唱歌跳舞，小學時有次跳「筷子舞」，爸爸仲特製一對釘咗窿兼穿埋繩嘅筷子畀佢，等佢喺舞台上揮灑自如！
馬興文就話，今次過百學生一齊畫飛鳥除象徵飛躍同更進一步外，其實飛鳥亦係貿發局嘅標誌，相當有意思。
卓妮