【本報訊】勞工界要求特首梁振英就標準工時立法及取消強積金對沖問題「找數」，飲食界的自由黨立法會議員張宇人，批評前特首曾蔭權爵士當年推行最低工資立法，嚴重打擊飲食業生計，令業界長期人手不足，消費者要捱貴飯，他警告現任特首梁振英不要強推標時立法及取消對沖，否則飲食業就「死得、冇得玩」。
張宇人昨日指出，飲食業生意已持續下跌近兩年，最大問題是生意額及人手都不足。他解釋，受到最低工資影響，以往飲食業主要聘請的五、六十歲女士，很多都轉做保安，甚至做水貨客。
張指曾蔭權當年推行最低工資是「口爽荷包（粒）」，要業界及全港市民「找數」，以往在快餐店吃午餐一般只需廿多元，現在要四十多元，推高通脹。他說：「我哋冇咗（最低工資）咁多十年都好哋哋，佢（曾蔭權）成日覺得我哋香港人，有人辛苦，有人困難，你哋僱主找數，乜都叫我哋去找數，咁你政府收咁多錢嚟做乜呢？」
對於勞工界要求梁兌現競選承諾落實標時及取消對沖，張稱：「佢夠應承過我哋唔會搞標準工時！」他指新加坡雖有標準工時，但沒有最低工資及有大量輸入勞工，「你（港府）又畀唔畀我大量輸入勞工吖？」若港府取消強積金對沖亦是不可為兼「戇居」，警告港府「諗都唔應該諗」。