政情：十全政綱 葉劉準備選特首？

新民黨今次以「我哋一齊贏返香港」為口號，葉劉解釋話，近月與不同界別市民接觸時，都一致認為近年香港表現令人失望，所以導致不少青年人上街、提出獨立自主等主張以表達對現狀不滿。佢認為政府嘅管治有改善空間，所以要同市民一齊努力，贏番香港。

葉劉更透露，會喺未來十個星期陸續派發一系列單張，單張關於要跨越「三座大山」，即係領展、鐵路票價同埋強積金對沖機制。另外，亦都同要贏番管治、立法會、司法制度、公務員嘅心、青年人未來等十個項目嘅建議有關，難怪葉劉形容單張非常完善。見佢講得咁認真，又真係似公布競選特首政綱一樣，拍得住當年特首梁振英（CY）參選時嘅六大綱領政綱添！

忍唔到口數CY不是

不過，如果葉劉真係要轉跑道參選特首，就唔能夠完成四年任期。但佢唔肯作出承諾會做足四年，大耍太極話大家太抬舉佢，因為上次特首選舉佢連提名票都唔夠喎！至於會否支持CY連任，葉劉話，黨內完全無傾過，因現階段要集中火力搞好立法會選舉，加上未到特首選舉報名期，未知有咩人競逐。雖然係咁，但佢承諾到時一定會為港人揀一位最有能力嘅人做特首咁話。咁即係暗示CY冇能力？葉劉初時仲忍口話，CY嘅表現應由大家評價，但最後都趁機數CY嘅不是，話佢嘅政策喺紙張上就好，但落區時就有明顯落差，好似喺寶馬山盲搶地，搞到當區嚴重交通擠塞。

前日CY喺答問大會遭到泛民、建制派議員圍插，今次連行會成員葉劉都一樣不滿，睇嚟CY真係腹背受敵，要連任都凍過水囉！