政情：梁敬國賞雕塑展晒西班牙話
為慶祝墨西哥駐港領事館成立五十周年，佢哋喺中環皇后像廣場搞咗個雕塑展，尋晚請咗商務及經濟發展局副局長梁敬國（Godfrey）主持剪綵儀式，佢喺致詞時仲講咗兩句西班牙話添！
雖然Godfrey今次係睇雕塑展覽，但對當地嘅文化特色了然於胸。佢話墨西哥留存大量瑪雅古蹟，對於曾修讀歷史嘅佢，實在係一個寶地，有機會的話一定會去開吓眼界。
今次展出一尊名為「墨西哥之翼」嘅雕塑，作者係墨西哥國寶級雕塑家馬林。呢尊雕塑只係由一個五米高龍門架，配合一雙翅膀組成，結構儘管簡單，但係有飛向自由嘅寓意，就相當發人深省。