政情：阿王抗拉布認錯「豬隊友」
立法會尋日下晝繼續審議《2016年醫生註冊（修訂）條例草案》，為咗抗衡預料醫學界議員梁家騮（怪醫）會繼續進行「一人拉布戰」，工聯會王國興（阿王）尋日朝早就帶同麥嘜畢業公仔同「剪布秘笈」，望議員可效法。不過，阿王竟然將麥嘜認錯係右眼有胎印嘅麥兜，完全唔發現自己「豬隊友」喎。
阿王話本屆立法會即將完結，等同「畢業」，但需要通過三條條例草案先至畢業，包括拉布多時嘅醫生註冊條例草案，同埋兩條對市民甚為重要嘅消防修訂條例草案及私營骨灰安置所條例草案。
除咗麥嘜畢業公仔，佢仲帶同「剪布秘笈」，內容係「得正正喺度，坐定定喺度，乜都唔駛做」，仲朗讀咗四次添！佢話若各黨派真正關顧民生，應該跟住「剪布秘笈」嚟做，咁就能夠成功「剪布」，畀三條條例草案通過。之不過，依家愈嚟愈多泛民反口話要拉布，睇嚟條草案都凍過水嘞！