政情：掌財會 勁心灰 重力波喜別三煞位
近年多項具爭議嘅工程需要立法會財務委員會撥款，令財委會成為「拉布」主要戰場，而財委會主席更成為泛民同政府之間嘅磨心。有「重力波」之稱嘅財委會主席陳健波早前都講話「見過鬼怕黑」，表明唔希望連任，佢尋日舉行年結記者會時，再次表明依家對立面好大，希望下一屆由其他人出任主席一職。埋單計數，今屆四年任期，已經有三個人先後出任財委會主席，除咗飲食界張宇人可以成功做足兩年，金融界吳亮星同埋重力波都係一年玩完，睇嚟呢個三煞位唔係人人都捱得住。
慨嘆多政治議題 氣氛唔好
重力波話過去一年喺財委會經歷唔少風風雨雨，包括有議員向佢提出不信任動議，又有人提出好多規程問題，不過佢仍然本住以和為貴嘅精神同議員互相溝通，可惜效果唔係好好。佢慨嘆今年有港珠澳大橋、創科局同高鐵撥款等多個政治議題，令議會氣氛唔好，有議員言行粗鄙，對主席作出無理指控，批評有個別議員為咗政治目的，漠視其他議員表決嘅權利，搞到佢都好唔開心。
寄語繼任人「腰骨要硬」抗壓
不過，最唔開心莫過於信錯咗人。佢話早排泛民議員透過旅遊界議員姚思榮做中間人，同佢講上周六唔加開會議，泛民就會通過所有議案，但最終前日最後一次財委會仍然係好多人拉布，未能完成所有議案嘅表決。佢大嘆唔好輕信人言，反而要為會議多爭取時間。畀人呃到心灰意冷，重力波都講到明，希望其他未做過財委會主席嘅議員下屆可以試吓，佢更寄語下任主席「腰骨要硬」，頂住壓力，又要預計有議員對議事規則一知半解。
除咗泛民拉布令佢意興闌珊外，官員表現唔好都搞到佢好激氣，佢話部分官員回答提問嘅質素有待提升，有啲人死唔認錯，搞到泛民議員不惜一問再問，建議為官員設立回應問題訓練班，等叻啲嘅訓練啲渣嘅，建議政府提交撥款申請前要做足工夫。
重力波又講到制度上改革，認為立法會人事編制委員會同工務小組委員會可以合併，而喺委員會上已經討論嘅事項，就可以交上財委會直接表決，減少審議時間。雖然佢口講唔做，但又提出多項改革，正所謂「不在其位，不謀其政」，下屆佢會唔會捲土重來，真係要放長雙眼睇吓嘞！