中環出更：卿姐三度失銀包 幸遇好心的哥
唔見咗銀包後有好多「手尾」要跟，包括要去銀行報失、再申請身份證等。通常試過一次以後，就會警惕自己唔好再犯錯，但身為民主黨主席嘅立法會議員劉慧卿（卿姐）就曾經兩次喺的士上遺失銀包，尋日又再度「重複犯錯」，好彩被的士司機（的哥）及時發現，卿姐先能夠「失而復得」。
曾大懵唔見電話
卿姐話尋日朝早搭的士到立法會，落車時攞住的哥找番嘅十蚊同埋把遮，跟住想將十蚊放入銀包先發現唔見咗銀包。佢即時致電黨友同其他泛民議員求助，約五分鐘後有同事叫佢去立法會示威區，的哥等緊佢，原來的哥喺附近酒店外等候時發現銀包，再送返立法會畀佢，而佢本來想畀酬勞嘅，但被的哥拒絕。佢又透露，銀包內有成七千蚊o架，好彩冇唔見啫！
佢第一次唔見銀包搵唔番，相隔唔夠一年又發生，所以佢已習慣喺下車時回頭檢查座位，但尋日因為攞住太多嘢唔記得咗。唔單止咁，佢亦曾經遺失電話，依家會習慣將電話放入手袋嘞！
唔講唔知，喺遺失銀包之後，卿姐可能驚魂未定，佢入立法會大樓打算返九樓辦公室時，啱啱有同事亦入升降機，但當升降機到達七樓時，佢未有為意就出升降機，好彩有同事嗌住佢咋！希望卿姐都要經常提醒自己，唔好再做「大頭蝦」。
卓妮