中環出更：抖暑熱辣辣 名人各自精彩
香港善德基金會主席董吳玲玲同老公董中浩早前為名下「翡翠紅星」開祝捷晚會，練馬師姚本輝同裕華國貨董事總經理余鵬春（PC）等好友都有到場。怕熱嘅馬匹終於可以抖吓暑，但董太就偏向「火爐」行，佢話月底將會帶一百二十位中學生到北京同西安交流，雖然京城夏天熱到似火爐，但舊年帶團時見到班學生好雀躍，所以都唔理得咁多，最緊要值得。
PC都冇得去風涼水冷嘅地方攤抖，佢會先到加拿大處理家族嘅房地產項目，然後到美國為太太嘅瓷畫展撐場。咪以為裕華只係專心做國貨，其實佢哋投資多元化，喺加拿大做發展商已三十幾年。PC喺家族企業中負責投資，佢話市道好時鍾意買股票及私募基金，但依家咁嘅形勢都係持現金最實際。佢就一定唔買債券，因為收益太保守，不如擺喺銀行好過。
同場仲有仁濟醫院副主席黃美斯（Macy）、卓悅控股主席葉俊亨、嶺南大學校董黃均瑜、黃大仙工商業聯會副會長黎天橋同許亮華等人。
黃美斯行山籌備秋天活動
Macy就笑言近排愈嚟愈鍾意行山，早前試行港島區大潭郊野公園同大埔鹿頸兩條路線，事關佢係今年秋天舉行嘅第二屆善德遠足百萬行籌委會主席，梗係要準備周詳喇！
講起本港經濟不景，葉俊亨都話最近零售市道未見起色，不過公司唔會裁員或關店，希望捱到明年大多數租約到期時，可以同業主傾減租令成本降低。
卓妮