特區冇神經政府不知實事求是，一味高調做騷，有姿勢冇實際，坐而論道，完全不知「空談誤國，實幹興邦」的道理。打從董伯伯開始，「八萬五」建屋目標成為「已經唔存在」嘅大笑話，董伯伯嘅豪言，一如現屆冇心甩肺政府，重中之重的房屋政策又係廢噏當秘笈，覓地無方施政無能，遂使公屋輪候冊愈積愈多申請人，三年上樓你呃人，劏房處處怎不加深民怨？
政府下巴輕輕，講咗當做咗，失信於民，施政難免無晒符！阿哥，由一支筆、一張櫈、一本拍紙簿開始就已經失信於民，你再講嘢，真係搵鬼聽喇！
一個政府，明明施政失效，卻還要死撐甚麼「適度有為」，真係唔講冇咁㷫，講起一把火！見微知著，冇神經政府若然有心有肺，又豈會如賭仔般充滿「積極樂觀」精神：一千幾百，猶如垃圾；一萬幾千，過眼雲煙；今季輸到仆直，下季開鑼再嚟過！政府施政須分秒必爭，豈能Hea住等運到？市井哲學就話「春去春回來，花謝花再開，女死女還在」啫，政府施政係要實幹，即所謂「踏石留印、抓鐵有痕」也，不能坐而論道，養一班廢官廢噏。
還記得牛頭角迷你倉火災燒得最厲害時，連在港鐵站都聞到煙味，其時民政事務總署署長謝小華卻說：「根據我們的理解，三個附近屋苑的情況非常平靜，而居民覺得今日煙的情況改善了好多，老人院的環境亦比昨日非常之好，不需要將在內居住的老人家搬去其他地方。」
你看，納稅人就是高薪厚酬養了如此多廢官，甚麼叫「根據我們的理解」，難道自己走出冷氣辦公大樓也委屈了你雙玉腿？民間呼籲設立禁閉營、退出聯合國《禁止酷刑公約》以解決假難民問題，冇神經政府卻依然詐聾扮懵。政府無能，趁早移民，咪當講笑啊！