政情：收料站：郭振華入勞顧會憂心標時
熱心公職嘅工業總會前主席劉展灝，上月因心臟病逝世後，外界好關注由邊個接任其公職，尤其係勞工顧問委員會同標準工時委員會嘅工作。政府尋日公布委任工總副主席郭振華接任為勞顧會代表，同時亦以勞顧會身份獲委任為標時委員。之不過，依家標時嘅勞方委員杯葛會議，到底郭振華有冇板斧可以拉佢哋返談判桌呢？
郭振華嘅任期由本月八日至十二月三十一日，即係早幾日已委任咗，但冇即時公布，而且任期亦相當短，只有不足半年，相信係接手劉展灝餘下嘅任期。工總主席鄭文聰話約兩星期前提名郭振華，因為總會內除咗劉展灝外，一向都由郭振華負責勞工方面嘅事務，勞資雙方立場並非對立，郭振華曾任區議會主席，相信佢知道點樣平衡各方利益，能夠勝任工作。
爭取與勞方溝通 重啟談判
郭振華直言對標時工作感到擔心，因為勞方委員已離開談判桌，會爭取多啲機會同佢哋溝通，自己之前未正式獲委任，所以未有身份接觸勞方委員，希望之後同其他資方委員商討，點樣游說勞方重返談判桌。
點解佢舊年區議會選舉放棄競逐連任？佢終於自揭謎底，話喺一一年發現心臟有少少問題，一三年惡化，當時曾將驗身報告畀所屬政黨睇，但黨叫佢「頂住先，可能會改觀（轉好）呢」，加上佢亦唔想做一半任期就唔做，後來覺得自己頂唔順，醫生亦認為佢唔可以做無休息嘅工作，否則佢個心唔捱得幾耐，所以到當時先決定放棄連任，現時情況穩定，委員會工作冇區議會咁大工作量，相信自己身體應付得到。
勞顧會勞方委員梁籌庭就話以往同郭振華冇乜接觸，希望佢日後唔會同勞工界「對着幹」，寸步不讓，而係有商有量，但佢對郭振華接任有憂慮，因為佢係新人，希望佢有唔明白嘅地方，可以問下其他委員喎。