政情：抗議浪接浪 廿人上門鬧漢奸黎
繼早前多批人士先後到壹傳媒黎智英（漢奸黎）寓所同壹傳媒大樓外抗議後，尋日下晝再有約廿人到場接力聲討，佢哋手持寫有「黑金禍港黎智英、罪大惡極」等紙牌同標語，喺漢奸黎寓所外高叫口號，直斥漢奸黎「賣國賣港、遺臭萬年」。
尋日下晝約三時，約廿名抗議人士抵達漢奸黎位於何文田嘅寓所外，佢哋手持寫有「黑金禍港黎智英、罪大惡極」同「賣國賣港、黎漢奸遺臭萬年」等字句嘅橫額，而部分橫額嘅下款則寫上「黑金政治關注組」。部分抗議人士更舉起寫有「黑金肥佬黎 毒媒壹傳媒」嘅紙牌。抗議人士在場逗留約一個小時，由一名男子帶領下高叫一輪「肥黎禍港 毒果殃民」等口號，未幾和平散去。
近月遭15次聲討
計埋今次抗議行動在內，自上月十日起計一個月以來，踩去漢奸黎寓所同將軍澳壹傳媒大樓外抗議嘅次數最少十五次，當中自稱霸王國際集團員工同苦主佔七次、正義聯盟佔三次，包括旅遊業界同其他人士則有四次。漢奸黎仇口咁多，睇嚟聲討佢嘅行動陸續有嚟。