政情：惹火夏千福回港搞乜事

夏千福喺一三年來港接替前任總領事楊甦棣嘅職務，處事作風高調，不時約見泛民主派人士，亦經常到各區參觀名勝同品嘗美食，然後影埋相放上fb，慌死人唔知佢喺香港搞搞震。

言論干預港事 中方鬧爆

就因為搞搞震，好快撞板。仲記得夏千福上任兩個月發表公開演說，當時正係政改方案諮詢階段，而港大法律系副教授戴耀廷等人正醞釀發起佔領行動。夏千福喺演說中話美國政府支持香港逐步實現真正普選，又話美國嘅原則係支持和平集會同示威自由，但冇支持任何政治人士或組織。呢番言論，令人質疑佢曲線撐普選同佔領行動。其後，外交部駐港特派員宋哲喺公署會見夏千福時，當面批評佢，叫佢唔好喺香港嘅內部事務說三道四，要求佢停止干預本港嘅事務。

畀中方點名批評成日喺香港搞風搞雨後，夏千福變得稍為低調，但冇耐就身痕，無喇喇帶埋英國、日本、加拿大、澳洲、新西蘭、印度同德國嘅七國領事，組成「小八國聯軍」一齊去深水埗嘅惜食堂，免費幫手派發食物畀香港弱勢社群。而根據英國駐港領事館上載嘅相片，個個領事都攞住把刀。作為「小八國聯軍」之首嘅夏千福，究竟想向邊個示警？

動作多多 社交網玩直播

依家卸任在即，夏千福繼續好熱衷fb，尋日搞埋直播訪問添！有人問佢未來有乜嘢計劃，佢就話自己從事外交長達三十三年，但即將從外交職位上退休，八月將會返港加入私人機構，希望保持低調咁話，但佢冇透露係邊間私人機構，同埋係乜嘢性質嘅工作。

夏千福由駐港澳總領事轉職私人機構，期間有冇需要「過冷河」或申請工作簽證就不得而知，但佢係咪會保持低調呢？以佢嘅「往績」，就好似「姣婆守唔到寡」咁，忍唔到幾耐，又再出嚟搞搞震，呢次佢竟然選擇返嚟香港做嘢，好難唔令人質疑佢係咪想繼續搞事囉！