中環出更：拉布笑病人 郭家麒被轟「冇醫德」
上個禮拜立法會二讀有關醫務委員會改革嘅草案，公民黨嘅投票取向係一黨三立場，畀外界鬧爆冇黨格同黨紀，該黨嘅議員郭家麒尋日喺財務委員會審議一項工程撥款又想拉布，更被進出口界嘅黃定光（象哥）狠斥佢「以病人作嘲諷」同「冇醫德」。
拒縮表決時間至一分鐘
郭家麒因不滿財委會主席陳健波就東涌興建污水管嘅討論「劃線」而提出中止待續，被否決後再提出五條臨時動議，擺明係想拉布，民建聯嘅陳恒鑌就要求將表決每條臨時動議嘅時間縮短至一分鐘。點知梁國雄話有啲議員完成排尿過程都要五分鐘，又指陳恒鑌「後生唔明」，但坐喺陳後面嘅五名議員「加埋三百歲」，所以唔同意縮短表決時間。
本身係泌尿科醫生嘅郭家麒更加打蛇隨棍上，以泌尿科嘅角度，話陳恒鑌去洗手間可能只需一分鐘，「你後面啲老人家」則要三至四分鐘，「屙唔淨唔係幾好，會有尿道炎」，又指擔心時間唔夠，議員拉拉鏈時會被拉鏈弄傷。
聽到呢番話，象哥即時光火，批評郭家麒以病人作嘲諷︰「你身為醫生用病人病徵開玩笑，你有咩醫德？」隨後五個臨時動議全數被否決，而東涌增建污水管工程嘅撥款最後花咗約三個半小時先獲得通過。
卓妮