中環出更：品牌年輕化 傳統要保留
環球經濟不景氣嘅情況下，連帶本地經濟亦受影響，各行各業依家都要各出奇謀逆市求存。香港品牌發展局尋日搞咗個午宴，邀請幾位上屆香港名牌選舉嘅得獎者即席分享營商之道，當中更有街知巷聞嘅老字號，其中一位就係來自大部分港人一定有食過嘅保濟丸公司李眾勝堂，該品牌總經理朱家榮話市場選擇愈來愈多，佢哋年輕化品牌形象嘅同時，都要保留傳統特色先可以獨當一面。
作為一個有逾百年歷史嘅老品牌，保留同創新之間往往要取得平衡，朱家榮話唔少人都對佢哋嗰陣強烈藥味印象特別深刻，唔少人聞到就驚，但正所謂苦口良藥，冇咗嗰種藥材味，啲人又會覺得冇咁有效，所以佢哋並唔打算捨棄嗰種味。同樣地佢哋藥盒包裝上嘅印花亦好經典，喺呢方面佢哋就可以充分利用同創新，善用包裝上的花紋來印製卡片及環保袋等其他產品，得意又唔老土。
沈運龍設計申專利避抄襲
同場仲有香港品牌發展局主席黃家和、副主席吳清煥、沈運龍、陳國民同得獎公司亞洲國際博覽館首席策略總監劉小慧與浪漫滿屋特色餐飲代表林卓樫等。要喺逆市發圍，除咗緊貼行情仲要帶領潮流，經營家電嘅陳國民近期見飲食界興起低溫慢煮，就設計相關產品吸客，做珠寶品牌嘅沈運龍就話有新設計就要即刻申請專利，否則被人抄襲咗就賺少好多兼嘥心機o架喇！
黃家和指經濟困境或意味有危自有機，同時是打造品牌的最佳時候，而香港企業最擅長打「逆境波」，依家開始接受報名嘅品牌選舉就正好選出當中成功嘅企業作為借鏡分享。
卓妮