立法會內務委員會尋日總結今屆立法會工作，主席梁君彥話，過去幾個月政府採取先易後難、民生先行嘅做法調動議程，令行政立法關係有改善，唔再係劍拔弩張，覺得下屆立法會可以參考呢個做法。佢又話，覺得泛民同建制各派一人出任內會正副主席係好事，認為大家互相配合，先可以加快立法嘅效率。梁君彥突然大吹和風，覺得可以同泛民合作，唔通係為爭奪下屆立法會主席鋪路？
立法會主席曾鈺成早前表明唔再競逐連任，而且多個建制派資深議員包括民建聯譚耀宗等都明言無意競逐連任，令下任立法會主席之位好大機會落入工業界梁君彥手中。平日曾鈺成未能主持會議，都會由梁君彥代為上陣，所以論經驗由梁接任主席屬正路，再加上梁向來手段強硬，相信亦係操盤人重視嘅條件之一。
對於更上一層樓嘅傳聞，梁君彥今日喺記者會上無直接否認，只係話今屆會期未完，自己向來實事求是，仍然未決定係咪參選，所以等重返議會時再決定。對於有泛民批評佢作風強硬，佢話接受批評，認為自己只係緊張程序，希望加快效率，強調自己強硬都係唔想違反議事規則。佢又話，自己有主動同泛民議員溝通。
不過，同泛民打好關係，都唔代表梁君彥係「坐定粒六」。有指佢來自工商界，並非根正苗紅，未能完全盡得操盤人信任，令佢出任主席一事添加變數。假如梁君彥並非主席人選，咁有邊個夠資格可以出任主席呢？
其實主席人選大熱倒灶嘅情況時有發生，好似○八年立法會選舉，時任立法會主席范徐麗泰宣布唔再參選，當時好多人都以為時任內會主席嘅自由黨劉健儀好大機會接任主席，但礙於劉健儀出身商界，操盤人最後揀咗曾鈺成。依家意氣風發嘅梁君彥，就好比當年嘅劉健儀，分分鐘中空寶都未定。