政情：民記退黨潮 輪到黃容根
建制派大黨民建聯（民記）接連有資深黨員退黨，繼黃大仙區議員陳曼琪及油尖旺區議員陳少棠退黨後，最新有前漁農界立法會議員黃容根宣布退黨。黃容根尋日開記者會大控訴，指唔少業界人士不滿現任漁農界議員何俊賢對業界嘅事唔上心，包括去年中秋節嘅筲箕灣避風塘火災、最近嘅吐露港死魚事件等，搞到要由其他議員甚至泛民主派議員幫手。佢話退黨係一件好難抉擇嘅事，承認對民記不滿。
黃容根話，自卸任以來收到唔少業界人士投訴，不滿何俊賢出席活動經常遲到早退，有啲團體甚至由何上任約到前年都未見人。咁佢又有冇當面向何俊賢反映呢？佢話，對何俊賢同民記領導層都反映過，最後大家都漠不關心。問到該黨有冇挽留，黃容根就話主席李慧琼曾經打過電話畀佢，但因為要開會未詳細傾。要處理接二連三嘅退黨潮，相信民記都有排煩喇。