政情：骨灰龕扯上同性婚姻 何秀蘭捱轟
今屆立法會會期所餘無幾，要通過餘下嘅法案真係分秒必爭，但工黨議員何秀蘭就提出修正案，要求將《私營骨灰安置所條例草案》中「親屬」嘅定義擴大，令到海外結婚嘅同性伴侶都可以申索骨灰，搞到關注性傾向歧視立法嘅團體要去立法會抗議。估唔到原本一條無乜爭議嘅草案都節外生枝，真係無風起浪喇。
性傾向條例家校關注組召集人黃偉明尋日聯同十多名成員到立法會請願，批評何秀蘭提出嘅修正案衝擊家庭定義及社會價值，要求何撤回修正案。何秀蘭亦有同關注組交流約十五分鐘，解釋修正案只針對非法骨灰龕場，令到同性伴侶可以取回伴侶骨灰，而現階段難以撤回修正案，但相信喺分組點票下好難獲得通過。
其實何秀蘭一直都關注同性婚姻議題，過往同志遊行都落力參與，但就估唔到骨灰龕都可以扯上關係，點知惹來團體狙擊，相信佢自己都始料不及。