政情：AV仁悔睇艷照 (火羅)度餘生
民主黨立法會議員何俊仁喺前年財爺宣讀財政預算案期間，公然喺會議廳席上用平板電腦瀏覽性感女郎艷照，因而被嘲諷為「AV仁」。AV仁舊年區議會選舉落敗，之後又宣布唔再擔任下屆立法會議員。即將結束議員生涯嘅AV仁接受傳媒訪問時承認，艷照醜聞令他感到「好瘀」，就連家人都尷尬到唔想再提，直言「人民不會忘記」。AV仁從政多年，沒諗過因為睇艷照幾分鐘快感搞到多年道行一朝喪！
當時死撐太攰不涉色情
AV仁當日喺會議廳用平板電腦連環瀏覽性感女郎艷照，喺佢凌亂嘅枱面上，仲放咗手抄嘅南唐李後主李煜《子夜歌》相似嘅詩詞「人生苦恨誰能免，銷魂獨我情無限」，難以令人聯想瀏覽艷照同吟詩與財政預算案有何關係。AV仁看艷照被發現之後，當時佢解釋因為太攰「分咗心」，並就事件道歉，但就死撐話唔涉及色情同道德問題。「分咗心」就一定喇，只係諗爆頭都諗唔到點解太攰仲要看艷照啫。
淪為笑柄 連累家人尷尬
電視台尋日播出AV仁嘅訪問中，佢就被問起呢件被形容為「污點」嘅艷照醜聞，佢承認︰「呢件事梗係好瘀啦，成為笑柄啦，我諗唔淨止我覺得尷尬啦，我屋企人都尷尬啦，所以我屋企人、親戚都唔係好想同我提呢件事。」對於睇艷照睇到連累家人，佢就當「學咗個咁嘅教訓」，仲話「人民不會忘記」喎。六四事件就話「人民不會忘記」啫，估唔到AV仁嘅艷照醜聞都要「人民不會忘記」，睇嚟大家每年要一併為艷照主角平反，打倒AV仁至得喇！
不過，AV仁唔知係咪心有不甘，喺訪問中話「你可能一生人做好多嘢，好轟烈，或者做好多嘢覺得做得相當唔錯，（甚至）成為你自己嘅一啲功績，但有啲錯你犯咗嘅話，係可能都會幾傷」。AV仁咁講，莫非佢仍然自我感覺良好，以為自己一生做咗好多好轟烈嘅事，只不過係難過「美人關」﹖