中環出更：94%受訪教師促罷免吳克儉
早前教育界立法會議員葉建源委託港大進行有關對教育局局長吳克儉（吳得掂）表現嘅意見調查，尋日再有新一輪調查結果，顯示有逾七成五受訪市民及逾九成四受訪教師要求罷免吳得掂。至於對吳得掂嘅支持度，市民平均只給予三十七點七分，而教師就給予廿八點三分，亦有不少人給零分。負責調查嘅港大民意研究計劃總監鍾庭耀話，同以往嘅數據比較，吳得掂已經「一沉不起，漸次向下」。
調查結果亦顯示，分別有五成三嘅市民和七成八嘅教師認為，吳克儉自一二年上任以來，表現令他們減少對本港教育發展嘅信心。另外調查亦有查詢市民認為教育局局長最需要具備甚麼條件，不論係市民或教師，超過六成人認為局長要有誠信、肯承擔和不逃避責任，要對教育有使命感。鍾庭耀話，調查反映市民怨氣頗高，希望明年換屆時，可參考調查結果，在民意方面多花工夫。
未處理好教育界議題
葉建源就話，會將調查結果發給政府，亦會嘗試與政府當局溝通。他批評，吳克儉冇教育專業背景，在任期間只關注「一帶一路獎學金」和外訪，亦未有處理好教育界嘅重要議題，應思考係咪應該自動辭職，退位讓賢。
卓妮