中環出更：商界創新增值抗逆市
近期天氣熱到爆，但係商界就凍到震。由全港四十多個商會及企業組成嘅香港商業專業評審中心（商評中心）早前舉行就職禮，孖人牌代理商昌興行政總裁余壽寧冧莊做會長。常務副會長朱雯迪話，商評中心成立目的係推動企業及員工持續進修，現時經濟市道麻麻，業界更應趁市淡自我增值。
余壽寧就話，中心成員包括批發零售、化妝品、鐘錶及美容等行業，個個都夠晒創新，特別係關懷社會及環境，例如重視消防安全。余壽寧突然爆肚講消防，唔通佢影射早前迷你倉大火？余壽寧就笑笑口澄清無意影射他人，只係真心認為商界應該關懷職場安全，例如用低瓦數燈膽，既慳冷氣又減低火災風險喎！
梁青華日行三萬步減磅
同場仲有中心常務副會長兼日本城副主席魏麗霞、莎莎國際主席郭少明細女郭詩雅等靚女。做生意最忌墨守成規，魏麗霞就話，日本城成立廿五年，已由當年嘅十蚊店變成擁有多個品牌嘅家品集團，印證創新求變精神好重要。郭詩雅都話，最近其公司已因應市道轉差而催谷網上業務。
鐘錶界名人新達貿易董事總經理周建榮及天寶鐘錶主席梁青華（華哥）都喺度。卓妮見華哥瘦咗好多，原來佢加入咗一個會為群組內成員進行排名嘅行路App手機程式，激發佢行路健身嘅鬥志，日日至少行二、三萬步，三星期即減咗十三磅，連膝頭舊患都大為好轉添！
卓妮