俗語有話「臨急抱佛腳」，完全可以喺班立法會議員身上體現到。今屆立法會會期尚餘九日，但扣埋假期實際只有七日開會時間，但至今仍積壓大量議程未審議，其中大會除咗審議緊改革醫務委員會嘅《二○一六年醫生註冊（修訂）條例草案》，仲有兩條政府法案正等候通過。至於財務委員會（財委會）嘅形勢就更加嚴峻，有消息指如果大會再度流會，財委會勢會搶奪剩餘可開會嘅時間。
第五屆立法會會期至下周五就結束，剩下七日會期真係彌足珍貴，皆因大會除咗審議緊嘅醫生註冊修訂條例草案，仲有《私營骨灰安置所條例草案》、《2015年消防（修訂）條例草案》、政府決議案及多條議員議案。不過，除咗三條條例草案具有法律效力，且同民生相關而急需要通過外，政府決議案及議員議案都無關痛癢，議員議案更有涉及要求引用《立法會（權力及特權）條例》成立專責委員會，調查特首梁振英家人機場行李風波，對政府嚟講，班議員真係唔傾好過傾喇。
睇番議程，財委會仲有十幾項撥款等待立法會審批，所以大會與財委會相比，其實係小巫見大巫，故此財委會除咗明日嘅一節兩小時會議外，已決定喺下周一、二加開共四節八小時會議，實行有會開到盡。不過，暫時都只係得十小時會議時間，真係一小時過一項撥款都搞唔掂。
而下周一又有內務委員會討論鉛水事件嘅特別會議，下周三及四就分別有最後一次大會及特首答問大會，財委會想加會都唔係咁容易，除非大會再出現流會，財委會先可以有機會「衝關」，但到時大會進度又會危危乎，真係十個煲五個蓋，點冚？立法會拉布拉到會期尾都未收科，流會次數更係多到破晒紀錄，臨煞科先至頭痕加會，真係自作自受。