政情：橄欖話卸任會開班教投資
英國脫歐影響環球經濟，小股民人心惶惶。一向投資有道嘅立法會議員陳鑑林（橄欖），對於後市不太擔心，認為距離真正脫歐仲有兩年，雖然會令港股波動，但相信波幅唔會太大，提醒投資者要小心為上，最緊要係諗清楚。佢建議，長線投資考慮公用股會穩陣啲，例如電、煤氣、港鐵，趁回落些少就可以入市，仲話最近煤氣都唔錯，十派一，「又派息、又派股，嘩，去邊度搵呀！」
柯創盛期待學嘢
至於滙控，橄欖就話要審慎啲睇，估計短期內難言會否回升，因為受到本身業績影響，遲啲可能要調整投資策略避險，包括或會減少喺歐洲嘅投資，但一郁就會影響其前景。至於領展，佢就認為其發展都「差唔多o架喇」，莫非佢唔睇好？橄欖仲話，打算遲啲卸任議員後開班授徒，教授投資知識，其「接班人」觀塘區議員柯創盛都話好期待跟橄欖學嘢喎！都係嗰句啦，任何投資可升可跌，橄欖嘅投資建議只作參考，大家要自行評估風險。