政府冇神經又增添多一個例子，令一眾行山友「憤怒鳥」！繼屯門徑被鋪上石屎後，有網民喺社交網站群組轉載屯門徑鋪上膠軟墊嘅照片，鬧爆漁護署帶頭搞破壞，將行山徑過分人工化，並語帶諷刺話「留名等睇裝埋扶手電梯」，另外多名行山友亦轉載貼，狠批有關工程「無聊、冇腦」，作為部門首長嘅漁護署署長梁肇輝，睇怕要快啲諗計「補鑊」，否則只會繼續喺網上成為眾矢之的。
